Invidus hic serpens temptavit frang

Invidus hic serpens temptavit frangere pacem, qua rex egregius Karolus, duxque inclytus una Dassilo perpetue tenebantur iure beato. Adgreditur, fama conctum contaminat orbem. Vocibus his puras pulsavit perfidus aures: Dasilo peccavit, linquit quia regia iussa, et sibi servitii non solvit foedera pacti. Haec dicta egregias Karoli volvuntur ad aures, et rumor coepit latum volitare per orbem, pulsaturque ipsis regis praesentia verbis, in primisque pias his dictis abdidit aures; Aiebat cunctis, hic vir mihi valde fidelis est, et Francorum deposcit prospera regnis. Ast rumor frequens regi firmabat, et omnis Conclamat tellus, non est dux ille fidelis. Vocibus his tandem motus iustissimus heros agmina coniungit, classemque in margine ponit Rheni, qui gallis scindit germanica terris. Felici cursu dictum transnavigat amnem, inclytaque innumeris tremuit Germania turmis. At rex Francorum stipatus milibus altis maximus et patriis exultat victor in armis, alloquitur proceres fidos, ac talibus inquit: O gens regalis profecta a moenibus altis Troiae, nam patres nostros his appulit oris, tradidit atque illis hos agros arbiter orbis, subdidit et populos Francorum legibus aequis, perpetueque illis sanxit formator ab astris hos fines amplos, capiendas funditus urbis ancillas servos famulatus reddidit omnes. At nuper nostris hostis surrexit in arvis. Invidus hunc serpens fortassis vulnere saevo.