FRANCISCUS EPISCOPUS SERVUS SERVORU

FRANCISCUS EPISCOPUS SERVUS SERVORUM DEI dilecto Filio Lucae Miroslao Buzun, Ordinis Fratrum Sancti Pauli Primi Eremitae sodali, hactenus Czenstochoviae in Sanctuario Claromontano Priori Monasterii, electo Episcopo titulo Chusirensi atque Auxiliari destinato Calissiensi, salutem et Apostolicam Benedictionem.

Claromontano in Sanctuario Beatissimae Virginis Mariae sub praesidium non solum pauper populus confugebat, variis in necessitatibus tutum quaerens refugium, sed etiam principes et reges, sacerdotes et episcopi una cum plebe flexis genibus devote orabant. Tu autem, qui in praesentia ibidem Prior es Monasterii, fidelem prosequens Ordinis tui sacri huius loci multorumque peregrinorum pastoralem curam, aptus Nobis videris ad gravius quoque officium sustinendum. Cum ergo recenter Venerabilis Frater Eduardus Janiak, Episcopus Calissiensis, Auxiliarem Episcopum sibi postulaverit ad aptius providendum gregis sui pastoralibus necessitatibus, Nos huic petitioni concedere cupientes hoc ministerium tibi concredi posse putamus, dilecte Fili, qui sacerdotalibus virtutibus rerumque agendarum peritia palam enites. Audito igitur voto Congregationis pro Episcopis, Apostolica Nostra auctoritate te nominamus Episcopum Sedis titularis CHUSIRENSIS teque Auxiliarem constituimus Calissiensem, perinde ac normis iuris canonici statuitur. Ad ordinationem tuam quod attinet, permittimus ut eam a quolibet catholico Episcopo extra Romam accipias, secundum liturgicas praescriptiones. Sed antea fidei professio erit tibi facienda et fidelitatis ius iurandum in Nos et Nostros Successores dandum secundum Ecclesiae leges normasve. Denique, dilecte Fili, Spiritum Sanctum deprecamur ut spiritalis benedictionis ubertate operam tuam fecundet, intercedente Beatissima Virgine Maria Regina Poloniae. Etenim “in opere suo apostolico Ecclesia ad eam merito respicit, quae genuit Christum, ideo de Spiritu Sancto conceptum et de Virgine natum, ut per Ecclesiam in cordibus quoque fidelium nascatur et crescat” (Lumen gentium, 65).
Datum Romae, apud S. Petrum, die quinto mensis Iulii, anno Domini bismillesimo decimo quarto, Pontificatus Nostri secundo.
FRANCISCUS PP.