Noverint universi presentes littera

Noverint universi presentes litteras inspecturi, quod nos P. tales et tales, qui in universo facimus numerum XLXVIIII, publice confitemur et recognoscimus in hiis scriptis: quod inclitus princeps et dominus, dominus frater Winricus etc., de consensu suorum conpreceptorum sui Ordinis nomine, misertus, tamquam pater et protector omnium peregrinorum illas partes Prussie visitancium, captivitate (sic) in qua detenti maximeque angustiati fuimus cuiusdam domini militis Bartkonis de Wesinburg, siti in iurisdiccione temporali illustrissimi regis Ungarie, ob singularem reverenciam serenissimi principis Karoli regis Francorum ceterorumque dominorum illustrium, sub quorum dominio particulariter residemus, ac omnium nostrorum favorem supradictorum, ad peticionem sibi per nos oblatam, benigne nobis, ut nos a prefata captivitate redimere possemus, accomodavit sine omni spe pecuniarum lucri liberaliterque mutuavit XXVII milia florenorum boni auri et valentis ponderis; talique condicione, ut VII milia dictorum florenorum in festo Omnium Sanctorum proxime venturo in Flandria et Brugge civitate, ceteraque viginti milia in festo Nativitatis Domini proxime post venturo, suoque procuratori .. vel qui pro tempore illo ibi fuerit, vel si forte aliquo casu fortuito ipsum abesse contingeret, consulibus civitatis predicte sine omni protractione (absque) omni dolo fraudeque solvere solempniter promisimus omnes integre et bonitate et pondere ut prefertur, et unusquisque nostrum principaliter et insolidum, sine aliqua excepcione iuris vel facti, obligantes bona fide promittimus in hiis scriptis.